MANILA, Philippines — Sinolo ng University of Perpetual Help System DALTA ang liderato makaraang pasabugin ang Lyceum of the Philippines University, 71-39, sa NCAA Season 100 juniors basketball tournament kahapon sa FilOil EcoOil Centre sa San Juan City.
Kumolekta si 6-foot-7 Lebron Jhames Daep ng 11 points, 7 rebounds, 2 steals at 1 block para sa back-to-back wins ng Junior Altas at ilista ang 4-1 kartada.
Laglag ang Junior Pirates sa 0-5 record.
Nakahugot si coach Joph Cleopas kay Jan Roluna ng 11 markers kasunod ang 10 points ni Jim Corpuz para sa Junior Altas na kaagad inilista ang 22-8 abante patungo sa 56-16 halftime lead sa Junior Pirates.
Mula rito ay hindi na pinabangon ng Junior Altas ang Junior Pirates sa second half.
Samantala, tinalo ng nagdedepensang Letran Squires ang Emilio Aguinaldo College Brigadiers, 73-54.
Panalo ang St. Benilde-La Salle Greenhills Greenies kontra sa San Beda Red Cubs, 78-65, habang wagi ang Mapua Red Robins sa Arellano Braves, 81-78.
Sinuwag naman ng San Sebastian Staglets ang Jose Rizal Light Bombers, 68-58.
Pinangunahan ni Sanlea Peñaverde ang ikalawang panalo ng Staglets sa kanyang double-double na 16 points at 10 rebounds.