MANILA, Philippines — Winalis ng King’s Montessori School ang De La Salle-Zobel A, 25-16, 29-27, para ibulsa ang isang quarterfinals seat sa 2025 Shakey’s Girls Volleyball Invitational League (SGVIL) Rising Stars Cup Division 1 kamakalawa sa La Salle Green Hills Gym.
Na-sweep ng Lady Vikings ang kanilang huling tatlong laro sa preliminary round para sa 3-1 record sa Pool C papasok sa knockout round ng pinakamalaking grassroots volleyball league na suportado ng Shakey’s Pizza Parlor, Peri-Peri Charcoal Chicken, Potato Corner at R and B Milk Tea.
Humataw si Paula Palma ng game-high 18 points sa pagbandera sa KMS sa pagdaig sa Lady Junior Archers na laglag sa 1-1 marka bagama’t nakakuha kay Aislinn Alemana ng 12 markers.
Kung magtatapos ang Lady Vikings sa No. 1 sa Pool C ay lalabanan nila sa quarterfinals ang second-ranked team sa Pool B.
Sakali namang mahulog sila sa No. 2 ay haharapin nila ang Pool A top seed.
Samantala, binalikan ng Arellano University ang California Academy, 20-25, 27-25, 25-11, para sa 2-0 baraha sa Pool C.
Pumalo si Samantha Maranan ng 22 points at may 11 markers si Catherine Chu para palakasin ang pag-asa ng Lady Braves sa quarters berth sa torneong itinataguyod ng Mikasa, Asics, Team Rebel Sports, Belo Deo at Smart.
Kaagad namang bumangon ang Cal Babies, nagreyna sa inaugural 2023 edition, mula sa nasabing kabiguan para talunin ang Corpus Christi School, 25-22, 25-21, sa likod ng 15 points ni Mhonnieck Soliven.
Wala namang hirap na nanalo ang Emilio Aguinaldo College matapos hindi sumipot ang University of Perpetual Help System Dalta para sa kanilang 3-0 card.
Pinabagsak ng nagdedepensang Adamson University ang Lyceum of the Philippines University, 25-18, 25-14, para sa 2-1 slate sa Pool A.