Pilipino Star Ngayon
October 22, 2025 | 12:00am
LOS ANGELES — Aminado si Luka Doncic na mahihirapan siyang dalhin ang Lakers sa pagsagupa sa bisitang Golden State Warriors sa pagbubukas ngayon ng NBA 2025-2026 season.
Ito ay dahil hindi lalaro si LeBron James bunga ng sciatica nerve injury.
“Obviously, going against Steph is very exciting,” ani Doncic kay Warriors star guard Stephen Curry. “It’s going to be tough. I don’t know if it’s a rivalry, but it’s for sure an exciting game.”
Nang maglaro ang Lakers at Warriors sa Araw ng Pasko sa nakaraang season ay nagpasikatan sina James at Curry.
Tumipa si James ng 31 points at 10 assists sa panalo ng Lakers, habang kumana si Curry ng 38 points sa panig ng Warriors.
“So even with LeBron out, it’s going to be a great game. Of course, we got to compete and we’re trying to get this dub (win),” sabi ni Lakers forward Rui Hachimura.
Sa Oklahoma City, sisimulan ni Shai Gilgeous-Alexander at ng Thunder ang pagdedepensa sa kanilang korona sa pagharap sa bisitang Houston Rockets na ipaparada si Kevin Durant.
Hindi makakalaro si Thunder star forward Jalen Williams dahil sa pagrekober niya mula sa isang offseason surgery sa kanyang kanang pulso.