MANILA, Philippines — Sa Farm Fresh lumipat sina Ces Molina at Riri Meneses, habang isusuot ni setter Mars Alba ang uniporme ng Akari sa umiinit na 2025 Premier Volleyball League (PVL) on Tour.
Nagmula ang veteran outside hitter na si Molina at ang middle blocker na si Meneses sa kanilang three-season stint sa Cignal HD.
Hinirang ang 30-anyos na si Molina bilang 2023 PVL Invitational Conference MVP bukod sa pagiging two-time Best Outside Spiker, habang nakamit ng 29-anyos na si Meneses ang Best Middle Blocker award noong 2022 Open Conference at 2023 Second All-Filipino Conference.
Inaasahang maglalaro sina Molina at Meneses, nakatulong sa runner-up finish ng HD Spikers sa 2024 PVL Reinforced Conference, sa pagharap ng Foxies (0-1) sa Choco Mucho Flying Titans (1-1) sa Sabado sa Capital Arena, Ilagan City.
Bago ang PVL on Tour ay kinuha ng Farm Fresh si Italian coach Alessandro Lodi at pinili sina Fil-Am setter Alohi Robins-Hardy at libero Anne Monares sa nakaraang 2025 PVL Rookie Draft.
Idinagdag din ng Foxies si middle blocker Des Clemente-De Guzman.
Samantala, lumipat naman si Alba, miyembro ng Alas Pilipinas national pool, sa kampo ng Chargers matapos maglaro sa Flying Titans.
Makakasama ni Alba sa Akari (1-3) sina Ivy Lacsina, Ced Domingo, Eli Soyud at Grethcel Soltones.