LAOAG CITY, Ilocos Norte, Philippines — Patuloy ang pamamayagpag ng mga National Capital Region tankers sa swimming event ng 65th Palarong Pambansa kahapon dito sa Ferdinand E. Marcos Memorial Stadium Swimming Pool.
Bumandera sa ratsada ng mga NCR swimmers sina Sophia Rose Garra at Titus Rafael Sia na sumisid ng apat at tatlong ginto, ayon sa pagkakasunod.
Bumida si Garra sa elementary girls’ 100m backstroke, 200m freestyle, 200m individual medley at 4×50 medley relay katulong sina Adrienne Reese Tacuboy, Kaelev Vianna Cabalida at Ceanna Gabrielle Mitra.
Tampok sa panalo ng Grade 6 student ng De La Salle Araneta University ang pagtatala ng bagong Palaro record na 2:31.41 sa 200m IM na bumura sa 2:33.12 mark ni Michaela Jasmine Mojdeh (NCR) sa Vigan, Ilocos Sur noong 2018.
Bagong record na 1:07.61 ang inilista rin ng 12-anyos na si Garra sa 100m backstroke para si rain ang sarili niyang 1:08.50 noong 2024 sa Cebu City.
Bumandera si Sia, incoming Grade 7 student sa Xavier School San Juan, sa elementary boys’ 200m freestyle, 100m backstroke at 4x50m medley relay kasama sina Reighlem Salon, Findlay Jake Mackenzie at Joshua Chua.
Ang iba pang nanalo sa kanilang mga events ay sina Findlay Jake Mackenzie (elementary boys’ 200m), Patricia Mae Santor (secondary girls’ 200m IM) at Raina Samantha Leyran (secondary girls’ 50m butterfly).
Nagsimula nang umarangkada ang NCR para sa pagdedepensa sa kanilang overall crown sa paghakot ng 52 golds, 26 silvers at 16 bronzes.