October 25, 2025 | 12:00am
MANILA, Philippines — Balik laro si Shaina Nitura upang sagipin ang Adamson University kontra tigasing College of Saint Benilde, 25-18, 15-25, 25-16, 25-22, sa do-or-die quarterfinals sa 2025 Shakey’s Super League (SSL) Preseason Unity Cup na nilaro sa Paco Arena, Manila, kahapon.
Hindi naglaro si Nitura, nakaraan para ipahinga ang kanyang minor injury at sa pagbabalik ay nirehistro nito ang triple-double na 16 points,mula sa 15 attacks at isang block kasama ang 11 digs at 10 excellent receptions upang isampa ang Lady Falcons sa semifinals.
Malaking bagay ang presensya ni power-hitting skipper veteran Nitura kaya ganado maglaro ang mga kakampi nito sa event na suportado ng Asics, Mikasa, Smart Sports, Summit, Team Rebel Sports, Belo Deo, Eurotel- Apo View Hotel, Batangas Country Club, Executive Optical, Baic Auto Philippines, SM Tickets at PusoP.com bilang technical partners.
“I’m really happy we did it together. I’m really happy right now and hopefully we’ll make it to the finals,” ani Framces Mordi na bumakas ng 18 markers para sa Adamson. “We felt really bad after we lost (in Game 1). However, after receiving some motivation and advice from our captain, Shai Nitura, it really helped us a lot to come back.”
Nagpakita ng determinasyon ang dalawang koponan sa unang dalawang sets kung saan may tig-isa silang panalo, 1-1 bago humarurot sa third at fourth frames ang Lady Falcons.
Makakatapat ng Adamson sa semis ang University of Santo Tomas sa Linggo sa Ninoy Aquino Stadium sa tournament katuwang ang Shakey’s Pizza Parlor, Peri-Peri Charcoal Chicken, Potato Corner at R and B Milk Tea.
Kumana si Zam Nolasco ng 14 points habang 11 ang nirehistro ni Rhea Densing para sa CSB na nalaglag sa classification round sa ligang mapapanood sa live and on demand via PusoP.com at Solar Sports.