MANILA, Philippines — Sisimulan ng NorthPort ang kanilang kampanya sa Season 49 PBA Philippine Cup sa pagsagupa sa Terrafirma sa Ninoy Aquino Stadium sa Malate, Manila.
Sasagupain ng Batang Pier ang Dyip ngayong alas-5 ng hapon kasunod ang salpukan ng NLEX Road Warriors at Rain or Shine Elasto Painters sa alas-7:30 ng gabi.
Sa likod nina import Kadeem Jack at Best Player of the Conference Arvin Tolentino ay hinirang ang NorthPort na eliminations topnotcher sa nakaraang PBA Commissioner’s Cup.
Matapos sibakin ang eighth-seed Magnolia Hotshots sa quarterfinals ay minalas ang Batang Pier sa Ginebra Gin Kings sa kanilang semifinals series.
“Kahit parang starting from scratch kami, bawal matalo pa rin,” sabi ni NorthPort coach Bonnie Tan sa pagharap nila sa Terrafirma na may 1-1 record makaraang manalo sa Phoenix at matalo sa nagdedepensang Meralco.
Sina Tolentino, Joshua Munzon, William Navarro, Fran Yu, Abu Tratter at Damie Cuntapay ang babandera sa Batang Pier katapat sina Terrence Romeo, Stanley Pringle, Aldrech Ramos at Louie Sangalang ng Dyip.
Bubuksan din ng Elasto Painters ang kanilang kampanya sa pagharap sa Roza Warriors na nakalasap ng 89-98 kabiguan sa San Moguel Beermen sa una nilang laro.
Nasibak ang Rain or Shine ng nagharing TNT Tropang Giga sa semifinals ng Commissioner’s Cup.
Hangad naman ng NLEX na makabangon sa pagkatalo sa SMB.