MANILA, Philippines — Nagbulsa ang National University Nazareth School ng isang quarterfinals ticket at kinumpleto ang four-game sweep sa Pool D matapos talunin ang University of Sto. Tomas, 25-14, 25-23, sa 2025 Shakey’s Girls Volleyball Invitational League (SGVIL) Rising Stars Cup Division 1 kahapon sa La Salle Green Hills Gym.
Papasok ang reigning UAAP at 2025 Palarong Pambansa champions sa knockout stage ng pinakamalaking grassroots volleyball league sa bansa na suportado ng Shakey’s Pizza Parlor, Peri-Peri Charcoal Chicken, Potato Corner at R and B Milk Tea.
Bumida sina Denesse Daylisan, Harlyn Seneche at UAAP MVP Samantha Cantada para sa top seed Lady Bullpups na lalabanan ang UAAP finals victim at Pool A No. 2 seed defending champion Adamson University sa quarterfinals bukas.
Nauna nang pinatumba ng NUNS ang University of the Philippines Integrated School, 25-18, 25-10, bago isinunod ang UST kinahapunan.
Samantala, isinara din ng Visayan powerhouse Bacolod Tay Tung ang Pool B tangan ang 4-0 baraha makaraang gibain ang Holy Rosary College, 25-17, 25-22, at Chiang Kai Shek College, 25-16, 25-11.
Makakatapat ng Thunderbolts sa quarters ang Pool D second seed Far Eastern University-Diliman.
Isang four-game sweep ang ginawa ng Arellano University sa Pool C mula sa 25-15, 25-18 panalo sa De La Salle-Zobel A.
Sasagupain ng Lady Braves sa quarters ang La Salle-Lipa sa torneong itinataguyod ng Mikasa, Asics, Team Rebel Sports, Belo Deo at Smart.