October 25, 2025 | 12:00am
MANILA, Philippines — Nanganganib na walang women’s volleyball team na masilayan sa aksyon sa 2025 Southeast Asian Games na gaganapin sa Disyembre sa Bangkok, Thailand.
Nagbanta ang Philippine Olympic Committee (POC) na i-pullout ang Alas Pilipinas Women sa SEA Games kung hindi susundin ng Premier Volleyball League (PVL) ang nakasaad sa Memorandum of Agreement (MOA).
“It’s about patriotism, putting flag and country above and before everything else,” ani POC president Abraham “Bambol” Tolentino na kasalukuyang nasa Bahrain para sa Asian Youth Games.
Ayon kay PNVF secretary-general Don Caringal, gumawa ang PVL ng MOA kung saan bubuo ng Alas Pilipinas Women mula sa 12 PVL teams kasama ang top collegiate athletes.
“The goal is to finish strong—and to win the gold—in all of the sports where Filipino athletes are entered in the Thailand SEA Games,” ani Tolentino.
Magpapadala ang Pilipinas ng 1,700 delegasyon sa SEA Games na magtatangkang makuha ang general championship na huli nitong nakamit noong 2019 edisyon.
“And we are all aware—after having won three Olympic gold medals—that winning involves an absolute participation and cooperation by an entire community,” ani Tolentino.
Maganda ang itinatakbo ng Alas Pilipinas Women sa ilalim ni Brazilian head coach Jorge Edson Souza de Brito kung saan nakapilak ito sa Hanoi 2025 at tanso naman sa Manila 2024 sa Asian Nations Cup.
May back-to-back bronze medals din ang Alas sa Vietnam SEA V-League sa 2024-25.