October 1, 2025 | 12:00am
MANILA, Philippines — Matapos mabigo sa World 10-Ball Championship, reresbak ang Pinoy cue masters sa 2025 Hanoi Open na idaraos din sa Hanoi, Vietnam mula Oktubre 7 hanggang 12.
Ipaparada ng Pilipinas ang 15 matitikas na players sa pangunguna ni defending champion Johann Chua na target madepensahan ang kanyang korona sa torneo.
Bilang paghahanda, sumasalang si Chua sa ilang pocket tournaments sa Hanoi upang masiguro na nasa tamang kundisyon ito bago ang torneo.
Kabilang na rito ang Tai 99 event kung saan nakaabot lamang sa Last 16 si Chua.
“Last 16 exit for me. Goodluck to all remaining eight players,” ani Chua sa kanyang post sa social media.
Sasabak din si reigning World 9-Ball champion Carlo Biado na nakaabot lamang sa semifinals ng katatapos na World 10-Ball Championship.
Yumuko si Biado kay eventaul World 10-Ball champion Chung Ko Ping ng Chinese-Taipei sa iskor na 0-3.
Bago ang Hanoi Open, masisilayan muna sa aksyon si Biado sa Peri Open na gaganapin sa Danang, Vietnam.
Makakasama nina Chua at Biado sa Hanoi Open ang mga kapwa beteranong sina Lee Vann Corteza, James Aranas, Jeffrey Ignacio at Roland Garcia.
Sasabak din sina Anton Raga, Jefrey Roda, Bernie Regalario, Patric Gonzales, AJ Manas, Michael Baoanan, Marvin Asis at Harry Vergara.
Nakalaan ang tumataginting na $200,000 kabuuang premyo tamok ang $40,000 para sa magkakampeon.