MANILA, Philippines — Bibihira ang pagkakataon na masisilayan ng personal ng mga Pilipino ang isang world-class event gaya ng FIVB Volleyball Men’s World Championship Philippines 2025.
Kaya naman magandang pagkakataon ang hosting ng bansa ng naturang event para ipamalas na ipakita sa buong mundo ang galing at husay ng mga Pilipino.
“It is a rare privilege to host such a world event especially the country’s popular sports—volleyball—and I am happy to see a lot of people who are very interested in volleyball,” ani William Vincent “Vinny” Araneta Marcos na co-chairperson ng FIVB MWCH Local Organizing Committee.
Nagsagawa ang mga organizers ng“Spike For A Cause” Fund Raising Dinner and Fashion Show na inorganisa ni First Lady Liza Araneta Marcos noong Sabado sa Foro de Intramuros sa Intramuros, Manila.
Dumalo sa pagtitipon sina senator Pia Cayetano at Mark Villar kasama si Department of Science and Technology Secretary Renato Solidum.
Nanguna ang men’s national team Alas Pilipinas sa mga rumampa sa naturang fashion show.
Ang Alas Pilipinas ang magiging kinatawan ng bansa sa world championship na papalo sa Setyembre 12 hanggang 28 sa Smart Araneta Coliseum at SM Mall of Asia.
Dumating din sina Rebisco Corp. president Geronimo Kamus Jr. at Honda representative Hiroaki Nakamura, chief client officer of Dentsu Philippines.
Ginawaran ng pagkilala ang Rebisco at Honda sa suporta nito para sa pagdaraos ng world championship na magtatampok sa 32 volleyball nations sa mundo.
Nagpasalamat din si Philippine National Volleyball Federation and Asian Volleyball Confederation president Ramon “Tats” Suzara kay First Lady Marcos sa suporta nito.