October 9, 2025 | 12:00am
MANILA, Philippines — Makakapaglaro na ang mga foreign reinforcements sa 2025 Premier Volleyball League (PVL) Reinforced Conference.
Ito ay matapos pirmahan ng Philippine National Volleyball Federation kahapon ng alas-6:30 ng umaga ang lahat ng International Transfer Certificates (ITCs) ng mga imports ng 12 koponan.
“We thank our players, teams and supporters for their understanding as we work to uphold the integrity and quality of the PVL matches,” pahayag ng PVL organizer Sports Vision sa isang official statement.
Hindi nakalaro sina reinforcements Anna DeBeer (ZUS Coffee), Annie Mitchem (Akari), Anyse Smith (Choco Mucho) at Oleksandra Bytsenko (Capital1 Solar Energy) sa opening-day matches noong Martes sa Ynares Center sa Montalban, Rizal.
Hindi pa kasi napipirmahan ng PNVF ang kanilang mga ITCs na kailangan sa ilalim ng FIVB regulations.
Tinalo ng Thunderbelles ang Chargers, 24-26, 25-23, 17-25, 25-24, 15-7, sa Pool B habang pinadapa ng Flying Titans ang Solar Spikers, 33-31, 26-24, 25-23, sa Pool A sa kan-kanilang all-Filipino lineups.
Ngunit ayon sa PVL, hindi ito opisyal na ililistang resulta ng mga laro at sa halip ito ay muling lalaruin sa itatakdang petsa sa pool play.
“This decision follows prior agreement among the participating teams, in the spirit of fairness, competitive parity, and delivering the best possible experience to our supporters,” wika ng PVL.
Samantala, ipaparada ng Petro Gazz si Lindsey Vander Weide laban sa Galeries Tower na itatapat si Jelena Cvijovic sa kanilang duwelo ngayong alas-4 ng hapon sa Dasmariñas Arena sa Cavite.
Isasalang ng Farm Fresh si Helene Rousseaux laban kay Paola Martinez ng Nxled sa kanilang bakbakan sa alas-6:30 ng gabi.