Pilipino Star Ngayon
October 9, 2025 | 12:00am
MANILA, Philippines — Pararangalan ang mga mahuhusay na batang atleta ng Pilipinas sa 5th Nickel Asia Corporation (NAC) Siklab Youth Sports Awards sa Sabado sa Grand Ballroom ng Diamond Hotel Manila.
Bibigyan ng spotlight ang mga Youth Heroes Awardees na sina weightlifters Jay-R Colonia, Alexandra Ann Diaz, Althea Bacaro, Jhodie Peralta at Albert Ian Delos Santos.
Bumuhat ang tropa ng kabuuang 10 gold, 3 silver at 3 bronze medals sa nakaraang 2025 World Youth and Junior Weightlifting Championships sa Lima, Peru.
Makakasama nila sina elite junior athletes Karl Eldrew Yulo (gymnastics), Rianne Malixi (golf), Pi Durden Wangkay (athletics), Dean Darnet Venerable (taekwondo), Tenny Madis (tennis), Kira Ellis (triathlon) at Sam Cantada (volleyball).
Ito ang pang-limang sunod na pagkakataon na gagawaran ng tropeo si Yulo, ang nakababatang kapatid ni 2024 Paris Olympics double gold medalist Carlos Yulo.
Ang event ay suportado ng Philippine Sports Commission, Philippine Olympic Committee, CEL Logistics, MVPSF, Smart/PLDT at Go For Gold.
Ibibigay naman sa 7-anyos na si jiujitsu prodigy Aielle Aguilar ang kanyang ikatlong sunod na Siklab honor matapos magdomina sa dibisyon niya sa Pan Kids IBJJF Tournament sa Orlando, Florida—ang pinakamalaking youth jiujitsu competition sa buong mundo.
Siya ay sasamahan nina Super Kids Awardees Xian Baguhin (boxing), Sophia Catantan (fencing), Kyra Abella (judo) at Joan Denise Lumbao (karate).
Ang mga top performers ng 2025 Palarong Pambansa ay pararangalan din ng PSC-PPC-POC Media Group.