October 19, 2025 | 12:00am
MANILA, Philippines — Panahon na para mas lalo pang magningning ang Southeast Asia sa mga world-class competitions gaya ng mga world championships.
Ito ang inihayag ni Philippine Sports Commission chairman Patrick Gregorio sa 8th Asean Ministerial Meeting on Sports na ginanap sa Hanoi, Vietnam.
Iginiit ni Gregorio ang kahalagahan ng mga sports tourism kabilang na ang pagdaraos ng malalaking world-class events sa rehiyon — sa Indonesia, Thailand, Cambodia, Malaysia, Myanmar, Singapore, Brunei, Timor Leste, Laos, Vietnam at Pilipinas.
“I personally and wholeheartedly support the inclusion of sports tourism as a key priority area – especially in the Southeast Asian region, which is now emerging as a sports hub globally,” ani Gregorio.
Ilan sa mga tinukoy ni Gregorio ang pagdaraos ng FIFA World Cup, World Games o maging ng Olympic Games sa Southeast Asia. Magagawa ito kung magsasanib-puwersa ang mga Southeast Asian countries.
Nagawa na ng ibang Asian countries ang pagho-host ng Olympic Games — ang Japan (1964 at 2020) South Korea (1988) at China (2008).
Subalit wala pang Southeast Asian country ang nakapaghost ng Summer Games.
Maaari itong maisakatuparan gaya ng ginawa ng Japan at South Korea na naging mag-co-host sa 2002 FIFA World Cup.
Nagawa rin ito ng Philippines, Japan at Indonesia sa 2023 FIBA World Cup.
“We must aspire to inspire. It’s about time. And why not? One Asean. One Olympic dream. One Olympic flame,” ani Gregorio.