November 5, 2025 | 12:00am
MANILA, Philippines — Walang planong kumurap ang Rain or Shine sa pitpitang karera sa tuktok kahit pa kontra sa palabang Phoenix sa umiinit na PBA Season 50 Philippine Cup sa Ninoy Aquino Stadium sa Maynila.
Magkikiskisan ang Elasto Painters (4-1) at Fuel Masters (1-4) sa main game ng double-header ngayong alas 7:30 ng gabi pagkatapos ng salpukan ng mga kulelat na Titan Ultra Giant Risers (1-4) at Blackwater Bossing (1-3) sa alas-5:15 ng hapon.
Kasalo ngayon ng RoS sa liderato ang TNT Tropang 5G at Magnolia sa dikdikang karera matapos maiwan ang NLEX (4-2) at Converge (3-2).
Nakahabol naman sa buntot ang reigning champion na San Miguel Beer (3-2) sa kalagitnaan ng 12-team standings upang mag-unahan sa Top 4 na hahawak ng ‘twice-to-beat ‘ advantage sa quarterfinals.
Ito ang misyon ng mga bataan ni coach Yeng Guiao na nakasakay sa tatlong dikit na panalo pinakabago ang 106-91 pagdaig sa Terrafirma Dyip.
“We cannot win close games every time. If we rely on breaks or we rely on getting lucky, there will be a day that luck won’t be on our side,” ani Guiao matapos mahirapan sa kulelat na Terrafirma.
Hindi agad naipagpag ng Elasto Painters ang Dyip sa nakaraan nilang laban at kinailangan pa ang bigating ratsada sa fourth quarter upang makaalpas.
Kontra sa Fuel Masters na gigil mawakasan ang tatlong sunod naman nitong kabiguan, hindi puwede ang puwede na para kay Guiao na mamanduhan sina Adrian Nocum, Anton Asistio, Santi Santillan, Keith Datu, Jhonard Clarito at Andrei Caracut para mamuno.
Para sa Phoenix na naiskor ang natatangi nitong panalo kontra sa San Miguel, 109-103, babandera sina Kai Ballungay, Jason Perkins, Tyler Tio, Ricci Rivero, Evan Nelle at Ken Tuffin matapos kapusin kontra sa lider na Magnolia, 83-80.