August 12, 2025 | 12:00am
ISANG guro sa Okayama, Japan, ang natanggal sa kanyang trabaho matapos mahuling suma-sideline sa isang convenience store na isang gawain na labag sa kontrata nang maraming empleyado sa Japan, kabilang na ang mga pampublikong guro.
Ayon sa ulat, isang 60-anyos na guro ang nakita at ini-report sa Okayama City Board of Education na nagtatrabaho sa isang convenience store. Kinumpirma ito ng kanyang school principal, na personal na pumunta sa convenience store isang Sabado, na araw ng pahinga ng guro.
Sa Japan, karaniwan sa mga kontrata sa trabaho ang pagbabawal sa pagkakaroon ng pangalawang trabaho. Ang lohika sa likod nito ay upang matiyak na ang buong atensiyon at enerhiya ng isang empleyado ay nakatuon sa kanyang pangunahing trabaho.
Inamin ng guro na nagtatrabaho siya sa convenience store mula pa noong November 2023 upang madagdagan ang kanyang kita, matapos siyang “i-rehire” ng kanyang pinagtatrabahuhang eskuwelahan. Ang “rehiring” ay isang hiring process sa Japan kung saan ang isang empleyado na umabot na sa retirement age ay muling iniempleyo para sa parehong posisyon ngunit may mas mababang sahod.
Humingi ng paumanhin ang guro para sa kanyang “hindi etikal” na gawain na nakasira umano sa tiwala ng publiko sa mga guro. Nag-sorry din ang Okayama City Board of Education sa kanilang mga estudyante.
Ang kaso ay nagdulot ng diskusyon online, kung saan marami ang kumukuwestiyon sa patakaran ng pagbabawal sa side job, lalo na kung ito ay isang marangal na trabaho at ginagawa sa labas ng oras ng pangunahing trabaho.