November 19, 2025 | 12:00am
MANILA, Philippines — Winalis ng ZUS Coffee ang talsik nang Nxled, 25-13, 25-21, 25-21, sa second round ng 2025 Premier Volleyball League (PVL) Reinforced Conference kahapon sa Ynares Center sa Montalban, Rizal.
Bumangon ang Thunderbelles sa una nilang kabiguan sa Cignal Super Spikers para ilista ang 7-1 record at muling umangat sa team standings.
Humataw si American import Anna DeBeer ng 16 points habang nagdagdag sina rookie middle blocker AC Miner at Chinnie Arroyo ng 15 at 10 markers, ayon sa pagkakasunod.
“It was a good win for us – just to get some confidence back after our last game,” ani DeBeer. “We came in, worked hard, and we’re getting ready for the quarterfinals.”
Tumipa si setter Cloanne Mondonedo ng 23 excellent sets para sa tropa ni coach Jerry Yee.
Pinamunuan ni Spa-nish reinforcement Paola Martinez ang Chameleons, laglag sa 0-8 marka, sa kanyang 15 points at nagtala si Lyann de Guzman ng triple-double na 10 markers, 11 excellent digs at 11 receptions.
Mapapasakamay ng ZUS Coffee ang top seed sa quarterfinals kung matatalo ang PLDT (6-1) at Farm Fresh (6-1) sa kanilang mga huling laro bukas.
Sa knockout quarterfinals ay makakatapat ng No. 1 team ang No. 8, lalabanan ng No. 2 ang No. 7, habang haharapin ng No. 3 ang No. 6 at magtutuos ang No. 4 at No. 5.
Sa ikalawang laro, sinapawan ng talsik nang Choco Mucho ang quarterfinalist Akari, 25-23, 21-25, 25-23, 25-21.