November 5, 2025 | 12:00am
MANILA, Philippines — Humataw si American import Anna DeBeer ng game-high 33 points para gabayan ang ZUS Coffee sa 23-25, 22-25, 25-23, 25-12, 15-7 reverse sweep sa Akari sa 2025 Premier Volleyball League (PVL) Reinforced Conference kahapon sa MOA Arena sa Pasay City.
Nagdagdag sina Jovelyn Gonzaga at Riza Nogales ng tig-11 markers, habang may 27 excellent sets si Cloanne Mondonedo para sa 5-0 record ng Thunderbelles.
Makakasama ng tropa ni coach Jerry Yee ang Chargers at ang nagdedepensang Creamline Cool Smashers, may parehong 3-2 marka, sa Pool C kung saan nila sasagupain ang bottom three teams mula sa Pool A.
Ayon kay Yee, mahaba pa ang labanan para magdiwang sila.
“Masarap pakinggan iyong 5-0, pero ang haba pa ng tournament eh,” sabi ni Yee.
“Bottom three kakalabanin pa natin, ikot pa tayo kumbaga, round robin ulit. And then iyong semis pa and then magpa-finals pa, masyado pang malayo,” dagdag nito.
Binanderahan ni American reinforcement Anne Mitchem ang Akari sa kanyang 27 points kasunod ang 15 markers ni Eli Soyud.
Nag-ambag sina Ced Domingo at Gretchel Soltones ng tig-11 points.
Bumangon ang ZUS Coffee mula sa 0-2 pagkakabaon sa Akari para makatabla sa fourth set, 2-2, at makahirit ng fifth frame.
Sa pangunguna nina DeBeer at rookie AC Miner ay nagpakawala ang Thunderbelles ng isang 8-1 atake sa fifth set.
Hindi na ito naputol ng Chargers.