November 4, 2025 | 12:00am
MANILA, Philippines — Ang pang-limang sunod na panalo ang titimplahin ng ZUS Coffee sa pagsagupa sa mapanganib na Akari sa 2025 Premier Volleyball League (PVL) Reinforced Conference.
Lalabanan ng Thunderbelles ang Chargers ngayong alas-4 ng hapon kasunod ang pagtutuos ng Capital1 Solar Spikers at Choco Mucho Flying Titans sa alas-6:30 ng gabi sa MOA Arena sa Pasay City.
Bumabandera ang ZUS Coffee sa Pool B hawak ang 4-0 record kasunod ang Akari (3-1), nagdedepensang Creamline (3-2), Petro Gazz (3-2), Chery Tiggo (1-4) at Galeries Tower (0-5).
Pareho namang may 4-1 baraha ang PLDT at Farm Fresh sa Pool A sa itaas ng Capital1 (2-2), Choco Mucho (2-2), Cignal (2-3) at Nxled (0-5).
Matapos ang mga preliminary round ay haharapin ng top three mula sa bawat pool ang bottom three ng magkabilang grupo.
Dadalhin ang kanilang mga kartada, ang Top 8 ang aabante sa knockout quarterfinals.
Muling aasahan ng Thunderbelles si American import Anna DeBeer katuwang sina Fiola Ceballos, Kate Santiago, Jovelyn Gonzaga Riza Nogales, AC Miner at Thea Gagate.
“Obviously, as a team, we want to win this thing. And we’re going to try our best to get there,” sabi ng 24-anyos na si DeBeer.
Itatapat ng Chargers sina reinforcement Annie Mitchem, Ivy Lacsina, Ced Domingo, Eli Soyud, Grethcel Soltones at Chenie Tagaod.