7 ginto itinakbo ng jr. athletics team sa Indonesia


Chris Co — Pilipino Star Ngayon

November 18, 2025 | 12:00am

MANILA, Philippines — Humakot ang natio­nal junior athletics team ng pi­tong gintong medalya sa 2025 Southeast Asian U18/U20 Athletics Champion­ships na ginaganap sa Mad­ya Athletics Stadium sa North Sumatera, Indonesia.

Nakamit ni Eric Joachim Hechanova ang ika-pitong ginto ng Team Philippines nang pagharian ang U18 3,000m race kahapon.

Nagtala ito ng siyam na minuto at 6.35 segundo para masiguro ang unang puwesto, habang tinalo nito sina Indonesian bets Sultan Hasibuan (9:17.60) at Fikar Giroth (9:26.58) para magkasya sa pilak at tanso.

Naramdaman din sina Jeralyn Rodriguez at Jecel Vivas na humataw ng gin­tong medalya sa kani-ka­niyang dibisyon.

Namayagpag si Rodri­guez sa U20 Women’s 400m sa bilis na 56.31 se­gundo at nanaig si Vivas sa U20 Women’s 100m hur­dles sa oras na 14.40.

Kumana rin ng ginto sina Courtney Jewel Trangia, Ma Lhynette Libranda at Ana Bhianca Espenilla sa kani-kaniyang individual events.

Nagreyna si Trangia sa U20 Women’s discus throw sa impresibong 39.41m na naibato nito.