August 23, 2025 | 12:00am
Sa kauna-unahang pagkakataon ay magbibida sa isang pelikula sina Will Ashley, Bianca de Vera at Dustin Yu. Love You So Bad ang titulo ng proyektong gagawin ng direktor na si Mae Cruz-Alviar.
“Merong parang two sides. So, who’s gonna win? It’s that tug-of-war na parang who’s going to win? Beautiful love story, full of kilig, a lot of lessons. And of course, this will resonate to all,” pagbabahagi ni direk Mae sa 24 Oras.
Masayang-masaya si Dustin dahil makapagbibida na sa pelikula na kasama ang kapwa-Pinoy Big Brother housemates. Ayon sa binata ay pinangarap nila habang nasa loob pa ng bahay ni Kuya na makapagtrabaho nang magkakasama pagkatapos ng PBB.
“Kami naman lahat sa bahay ni Kuya, ‘yon ‘yung dream namin paglabas, makapag-work kami together. But ngayon, tatlo kami, super talagang natuloy ‘yung manifestation,” kwento ni Dustin.
Bata pa lamang daw ay talagang pinapangarap na ni Bianca na makapagbida sa isang pelikula. Hindi halos makapaniwala ang Kapamilya actress na mangyayari na ito ngayon.
“I’ve waited for this moment for a very, very long time. So grabe, parang sabi ko, shocks! Totoo ba ito? Kasi, Lord, kung panaginip ito, gisingin mo na ako,” nakangiting pahayag ni Bianca.
GMA Pictures, Regal Entertainment at Star Cinema ang magsasanib-pwersa upang gawin ang naturang pelikula. Sobrang excited na ngayon ni Will na makapagsimula ng kanilang shooting. “No’ng sinabi sa akin na magkakaroon kami ng film, sobrang na-excite ako. Kasi sobrang love ko talaga mag-shoot ng mga film and sobrang nai-enjoy ko. And knowing na makasama ko sina Dustin, Bianca,” paglalahad ni Will.
Belle, may takot na wala si Donny
Isa si Belle Mariano sa mga bida ng pelikulang Meet, Greet & Bye mula sa Star Cinema. Kasama ng aktres sa naturang proyekto sina Maricel Soriano, Joshua Garcia, Juan Karlos at Piolo Pascual. Magkahalong emosyon ang naramdaman ni Belle nang malamang hindi na si Donny Pangilinan ang makakasama sa naturang proyekto.
“I feel like this one since it’s far different from the previous ones I’ve done. It’s my first project outside of a love team. Siyempre may takot at first kasi nga I’m so used to working with Donny. I love working with Donny. So parang may kaba pero at the same time, sabi ko this is something new. I want to grow, I’m always open to growth, and I’m always open to learning more,” pagtatapat ni Belle.
Kahit hindi magkasama sa mga proyekto ngayon ay suportado pa rin ng tambalang DonBelle ang isa’t isa. Mayroon ding bagong serye na ginagawa si Donny ngayon na hindi kasama si Belle. “Both of us have been vocal about it na we’re always there to just support each other and champion each other in terms of our career growth. Whether that with each other or apart from each other,” giit ng aktres.
Mahigit 13 taon nang aktibo sa show business si Belle. Malaki ang pasasalamat ng dating child star sa pamunuan ng ABS-CBN dahil sa patuloy na pagtitiwala sa kanyang talento. “It makes you a stronger person, and I think those experiences molded me into who I am today. Being a Kapamilya for me is growth, and I’m so grateful to be in this family,” paliwanag ng dalaga. (Reports from JCC)