August 24, 2025 | 12:00am
MANILA, Philippines — Nagpasiklab si Olympian Kayla Sanchez matapos banderahan ang mga nanguna sa 2025 National Swimming Tryouts na ginaganap sa Teofilo Yldefonso Swimming Center sa Rizal Memorial Sports Complex sa Malate, Manila.
Nagparamdam ng lakas si Sanchez nang maabot nito ang qualifying time standards (QTS) sa dalawang events para masiguro ang kanyang tiket sa national team na sasabak sa 33rd Southeast Asian Games sa Bangkok, Thailand sa Disyembre.
Pinagreynahan ni Sanchez ang women’s 100-meter freestyle sa bilis na 55.00 segundo para lampasan ang 58.23 QTS.
Pumangalawa si Filipino-British teen Heather White na may QTS na 56.23 habang ikatlo naman si 2023 Cambodia SEA Games champion Xiandi Chua (56.95).
Muling humataw si Sanchez nang manguna ito sa women’s 50-meter backstroke sa oras na 29.00 segundo para payukuin sina silver medalist Quendy Fernandez (29.23) at bronze winner Teia Isabella Salvino (29.85).
Pasok din ang oras nina Fernandez at Salvino sa QTS.
Ramdam din ang lakas ni two-time World Junior Championship veteran Jasmine Mojdeh ng Behrouz Elite Swimming Team matapos itong humataw ng ginto sa women’s 200-meter butterfly sa bilis na 2:18.18 para maabot ang QTS na 2:18.26.
Pinataob ni Mojdeh sina Patricia Mae Santor (2:19.45) at Shairinne Floriano (2:25.40).