September 6, 2025 | 12:00am
MANILA, Philippines — Aprubado na ang three-team trade tampok ang Converge, Phoenix at NorthPort hindi pa man nagsisimula ang PBA Season 50 Rookie Draft.
Swak sa FiberXers si Larry Muyang kapalit ni Jeo Ambohot na ibinigay ng Fuel Masters sa Batang Pier kapalit ni Evan Nelle.
Nasa proseso ang NorthPort ng pagbenta ng prangkisa nito sa Pureblends na unang naging galaw ang pagsikwat kay Ambohot matapos mawala sa kanila si Muyang.
Umalis si Muyang nang biglaan sa Fuel Masters noong nakaraang season upang maglaro para sa Pampanga Giant Lanterns sa MPBL.
Ito ang dahilan ng pagpataw sa kanya ng PBA ng indefinite ban noong nakaraang buwan subalit maaalis ito kapag na-activate na siya sa roster ng Converge para sa PBA Season 50.
Sasamahan ng 6-foot-6 na si Muyang sina Justine Baltazar at Justin Arana para sa pinalakas na triple towers ng FiberXers.
Inaantay pa ng Converge si Mikey Williams na nakuha nila mula sa TNT kapalit ni Jordan Heading upang mapalakas din ang backcourt sa pangunguna ni Alec Stockton.
Bukod dito ay nakatakdang masikwat din ng Converge ang No. 2 pick mula sa Phoenix ayon sa kanilang 1-on-1 trade proposal para sa mismong Rookie Draft bukas sa SM Mall of Asia Music Hall sa Pasay City.
Mabibingwit ng Converge ang No. 2 pick ng Phoenix kapalit ni Bryan Santos sahog pa ang kanilang No. 8 pick at future second-round pick.
Terrafirma ang may tangan ng No. 1 pick.
Samantala, lumabas na pinakamatangkad si Geo Chiu ng Ateneo sa kanyang taas na 6’9 sa lahat ng 126 aplikante matapos ang biometrics at skill tests ng PBA Season 50 Rookie Draft Combine sa Ynares Sports Arena sa Pasig City.
Ilan sa inaasahang magiging top selection ay sina Chiu, Juan Gomez De Liaño, Jason Brickman, Will Gozum at Dalph Panopio.
Bumandera sa jumping tests sina Fil-Ams Ashon Andrews at Jake Gaspay.
Tabla sa 33.4 inches sina Andrews at Gaspay para sa pinakamataas na standing vertical jump.
Nagtabla rin sa best Reaction Time sina Bryan Sajonia ng San Beda at Sean Quitevis ng Ateneo sa 0.29 segundo.