October 9, 2025 | 12:00am
MANILA, Philippines — Hindi pa tapos lumaban si Manny Pacquiao.
Kinumpirma kahapon ng Filipino icon ang pagbabalik niya sa boxing ring sa Enero 24, 2026 sa Las Vegas matapos wakasan ang kanyang four-year retirement at nilabanan si Mario Barrios noong Hulyo.
Sa isang video mula sa Indistry Media ay inihayag ni Pacquiao (62-8-3, 39 knockouts), magiging 47-anyos sa Disyembre, ang eksakstong petsa ng kanyang pagbabalik sa aksyon.
“Hello to all my boxing fans. I’m excited to let you know that I will be returning to the ring January 24th in Las Vegas,” ani ‘Pacman’ sa video.
Wala pang inihahayag na kalaban si Pacquiao, ngunit nasa listahan na nito si World Boxing Association (WBA) welterweight champion Rolly Romero (17-2, 13 knockouts).
Ang ‘come-forward style’ ni Romero bukod sa hawak na world title ng American boxer ang nagbigay sa kanya ng pagkakataong harapin si Pacquiao na hangad maging pinakamatandang welterweight titlist sa boxing history.
Sa isang media appearance noong nakaraang linggo para sa “Thrilla in Manila 2” festivities ay sinabi ni Pacquiao na pinapanalisa na ang kanilang laban ni Romero.
Susubukan ni Pacquiao na lampasan ang kanyang record na itinala niya noong 2019 nang talunin si Keith Thurman para sa parehong WBA title sa edad na 40-anyos.
Muntik niyang maagaw kay Barrios ang suot nitong World Boxing Council belt noong Hulyo 19 sa Las Vegas na nauwi sa majority draw.