November 6, 2025 | 12:00am
MANILA, Philippines — Kinadena ng defending champion University of the Philippines ang pangatlong sunod na panalo matapos lusutan ang University of Sto. Tomas, 89-88, sa UAAP Season 88 men’s basketball tournament kahapon sa SM Mall of Asia Arena sa Pasay City.
Umarangaka sa opensa si Harold Alarcon upang tulungan ang Fighting Maroons na ilista ang 7-3 karta at patibayin ang kapit sa No. 2 spot sa team standings sa ilalim ng National University na may 8-2 card.
Isinalpak ni Alarcon ang huling walong puntos ng UP kasama ang clutch fadeaway jumper na nagbigay sa kanila ng bentahe sa huling 24 segundo.
Naging matatag sa dulo ang Fighting Maroons para makuha ang panalo at ipalasap sa Growling Tigers ang ikaapat na sunod na kabiguan.
Pinamunuan ni Alarcon ang puntusan para sa UP sa kanyang 22 points bukod sa 5 rebounds, 4 assists at 3 steals, habang 19 markers ang ambag ni Rey Remogat.
Bumira si Collins Akowe ng 26 points at may 18 markers si Nic Cabanero para sa 5-5 marka ng UST na sumalo sa three-way tie sa No. 4.
Sa unang laro, tinapos ng Ateneo de Manila University ang five-game losing slump matapos takasan ang sibak nang University of the East, 78-74.
Humakot si Nigerian center si Divine Adili ng 15 points at 12 rebounds para sa 5-5 marka ng Blue Eagles.