November 16, 2025 | 12:00am
MANILA, Philippines — Kumonekta ang PLDT sa kanilang ikaapat na sunod na panalo matapos patumbahin ang Chery Tiggo, 26-28, 25-12, 25-16, 25-13, sa second round ng 2025 Premier Volleyball League (PVL) Reinforced Conference kahapon sa Ynares Center sa Montalban, Rizal.
Humataw si Fil-Canadian Savi Davison ng career-high 36 points bukod sa 14 receptions at 10 digs para sa kanyang triple-double at itinaas ang High Speed Hitters sa 6-1 record kagaya ng mga baraha ng Farm Fresh Foxies at ZUS Coffee Thunderbelles.
Naagaw ng PVL on Tour at Invitational Conference champions ang No. 1 spot dahil sa kanilang superior set ratio points.
Nagdagdag si Russian import Anastasiia Bavykina ng 16 markers at 10 receptions.
Pinamunuan ni Cuban hitter Yunieska Batista ang Crossovers, bagsak sa 2-5 kartada, sa kanyang 27 points kasunod ang siyam na marka ni Ara Galang.
“Naging aggressive sila nu’ng first set, tapos nagkataon iyong mga crucial points kami ang nagbigay,” sabi ni PLDT coach Rald Ricafort sa 28-26 panalo ng Chery Tiggo sa first set.
Inagaw ng High Speed Hitters ang second frame, 25-12, bago kunin ang third at fourth sets sa likod nina Davison at Bavykina para talunin ang Crossovers.
Sa unang laro, mabilis na dinispatsa ng Farm Fresh ang talsik nang Galeries Tower, 25-23, 25-13, 25-11, para sa ikatlong sunod na arangkada.
Pumalo si Belgian import Eli Rousseaux ng 19 points mula sa 13 attacks, tatlong blocks at tatlong service aces para sa 6-1 kartada ng Foxies.