November 26, 2025 | 12:00am
MANILA, Philippines — Kinumpleto ng Jose Rizal University ang quarterfinals cast ng NCAA Season 101 men’s basketball tournament matapos patalsikin ang Emilio Aguinaldo College, 80-76, sa Group B play-in game kahapon sa FilOil Centre sa San Juan City.
Bumanat si Stephen Garupil ng 14 points, 5 rebounds at 3 assists para sa Heavy Bombers na lalabanan ang Group A top seed Perpetual Altas sa quarterfinals bukas sa Mall of Asia Arena sa Pasay City.
May tangan na ‘twice-to-beat’ advantage ang Perpetual laban sa Jose Rizal.
Bukod kay Garupil ay sinandigan din ng Heavy Bombers sa fourth quarter sina Allan Laurenaria, Justin Lozano at Harry Herrera na nagsalpak ng dalawang free throws sa dulo ng laro.
Sa unang laro, sinibak ng Lyceum Pirates ang San Sebastian Stags, 70-63, sa Group B play-in match.
Kumolekta si Ato Barba ng 22 points, 3 rebounds at 3 assists para sa paghahamon ng Pirates sa Group B No. 1 San Beda Red Lions sa quarterfinals bukas.
Bitbit ng San Beda ang ‘twice-to-beat’ bonus kontra sa Lyceum.