MANILA, Philippines — Hindi maglalaro sina Fil-Ams Brooke Van Sickle at MJ Phillips sa pagsagupa ng All-Filipino Conference champion Petro Gazz sa Nxled sa Premier Volleyball League On Tour sa Batangas City Sports Center.
Kasama kasi ang dalawa sa kampanya ng Alas Pilipinas sa 2025 VTV International Women’s Volleyball Cup sa Vietnam.
Haharapin ng Gazz Angels ang Chameleons ngayong alas-6:30 ng gabi matapos ang pagtutuos ng Choco Mucho Flying Titans at Galeries Tower Highrisers sa alas-4 ng hapon sa Pool A.
Sa pagkawala nina Van Sickle at Phillips ay sasandal ang Petro Gazz kina Jonah Sabete, Myla Pablo, Nicole Tiamzon, Aiza Pontillas, Joy Dacoron at setters Djanel Cheng at Chie Saet.
Itatapat ng Nxled sina EJ Laure, Lucille Almonte, Lycha Ebon, May Luna at Chiara Permentilla.
Wala rin sa lineup ng Choco Mucho si rookie setter Tia Andaya na kasama ng Alas Pilipinas sa Vietnam.
Sina Dindin Santiago-Manabat, Royse Tubino, Isa Molde, Des Cheng at Cherry Nunag ang isasabak nila sa Galeries Tower na ibabangga sina Jewel Encarnacion, Ysa Jimenez at France Ronquillo.
Kasama ng Gazz Angels, Chameleons, Flying Titans at Highrisers sa Pool A ang PLDT High Speed Hitters at Farm Fresh Foxies.
Nasa Pool B naman ang Creamline Cool Smashers, Cignal HD Spikers, Capiital1 Solar Spikers, Akari Chargers, Chery Tiggo Crossovers at ZUS Coffee Thunderbelles.
Nauna nang hinataw ng Creamline at Cignal ang parehong 2-0 record matapos gibain ang Capital1 at Akari sa pagsisimula ng pre-season tournament sa Vigan, Ilocos Sur.