Pilipino Star Ngayon
September 9, 2025 | 12:00am
CEBU, Philippines — Handa na ang Alas Pilipinas sa pagsabak sa FIVB Volleyball Men’s World Championships na nakatakda sa Setyembre 12 hanggang 28 sa Mall of Asia Arena at sa Smart Araneta Coliseum.
“We are ready to make history,” wika ni Philippine National Volleyball Federation president Ramon “Tats” Suzara sa media day ng mga Pinoy spikers na idinaos sa National Museum of Natural History sa Manila.
Binalikan ng mga national team players at coaches ang kanilang mga pinagmulan at gagamitin itong motivation sa pagsagupa sa mga bigating world volleyball squads sa 32-team spectacle.
Unang lalabanan ng Alas Pilipinas ang No. 42 Tunisia sa Setyembre 12.
Nasa Pool A din ang 11-time African champion at World No. 23 Egypt at ang World No. 13 Iran.
“We are days away from history. Let’s make this happen and show the world that the Filipinos are one of the best fans in the world,” dagdag ni Suzara na nagsisilbi ring presidente ng Asian Volleyball Confederation (AVC) at executive vice president ng FIVB.
Pinamumunuan din ni Suzara ang Local Organizing Committee ng world meet katuwang sina Presidential son William Vincent “Vinny” Araneta Marcos, Senator Alan Peter Cayetano at Tourism Secretary Christina Frasco.
Naglibot sina team captain Bryan Bagunas at veteran ace Marck Espejo sa loob ng museum.
“It’s an honor to be part of this historic event. We’re excited to play and show the level and brand of Philippine volleyball in the world stage,” sabi ni Espejo na umaasaang magagamit ng Alas Pilipinas ang kanilang European camp sa pagsagupa sa mga higher-ranked opponents.
“Sa matagal naming pagsasama sa Europe, nakila po namin lalo ang isa’t isa. Ready na po kami maglaro para sa bayan. Pangakong gagawin po namin ‘yung best namin hindi lang basta makadikit o makakuha ng set pero para manalo ng games,” dagdag nito.
Nilabanan ng Alas Pilipinas sa tune-up games sa European camp ang Romania, Morroco at Portugal.