November 1, 2025 | 12:00am
MANILA, Philippines — Matapos ang Round-of-16 exit ni tennis sensation Alex Eala sa Hong Kong Open ay nais naman nito na sumabak sa 2025 Southeast Asian Games sa Thailand sa darating na Disyembre.
“It is in my plans,” sagot ni Eala sa nagtanong na mediaman matapos nitong yumuko kay Victoria Mboko, 6-3, 3-6, 4-6, sa Hong Kong Open noong Huwebes.
Ayon sa 20-anyos na si Eala, nahagip na rin nito ang target niya ngayong taon na mapabilang sa top 100 bago matapos ang 2025.
“The target I had to end the year was top 100, and that was kinda like pushing it for me, and we passed that by a milestone, so I’m so happy.” ani Eala na kasalukuyang pang 51 sa world.
Base sa ulat ng Spin.ph, plano rin ng Philippine Sports Commission, (PSC) at ng Philta na magkaroon ng WTA event sa kauna-unahang pagkakataon sa Pilipinas.
Sinabi ni PSC chairman Patrick ‘Pato’ Gregorio na malaking bagay ang naibigay na inspirasyon ni Eala para maisip ang maambisyon na plano.
“Alex made us realize that we can do much more for Philippine Tennis. It deserves a home in the Philippines — a home for tennis and a home for Alex. We will work with Philta and with other tennis stakeholders to make this happen in the near future,” ani Gregorio.