Pilipino Star Ngayon
October 3, 2025 | 12:00am
MANILA, Philippines — Puntirya ni Alex Eala na maipagpatuloy ang magandang inilalaro nito upang makahirit ng tiket sa semifinals ng Suzhou Open sa Sungent International Tennis Center sa Yangcheng Lake Peninsula sa Suzhou, China.
Sasagupain ni Eala sa quarterfinals si Viktorija Golubic ng Switzerland ngayong araw.
Mapapalaban ang fourth-seeded na Pinay netter dahil malalim ang karanasan ng 32-anyos na Swiss player.
Hawak ni Golubic ang No. 6 seed sa torneo at kasalukuyan itong No. 70 sa WTA rankings.
Nakaabot ito sa quarterfinals ng Wimbledon Championship noong 2021, habang nakarating ito sa third round ng Australian Open noong nakaraang taon.
Sumampa rin sa second round si Golubic sa nakalipas na Grand Slam events — sa 2025 US Open at 2025 French Open.
Sa kabilang banda, inaasahang mas magiging agresibo si Eala lalo pa’t nakapagpahinga ito ng isang buong araw matapos ang kaniyang pahirapang second-round match.
Umabot ng tatlong oras at 18 minuto ang laban ni Eala bago makuha ang 7-6 (5), 6-7 (3), 7-5 panalo laban kay Greet Minnen ng Belgium.
Kaya naman magandang pagkakataon ang one-day break nito para makarekober.
Una nang tinalo ni Eala si Katarzyna Kawa ng Poland sa opening round sa iskor na 6-3, 3-6, 7-5.
Sa pagpasok ni Eala sa quarterfinals, umakyat ito sa No. 54 sa WTA live rankings — ang panibagong career-high nito sa rankings.
Inaasahang aangat pa ito sa oras na makapasok si Eala sa semis o magtuluy-tuloy ito sa finals hanggang makuha ang kaniyang ikalawang WTA title sa taong ito.
Nauna nang nagkampeon si Eala sa Guadalajara Open.