September 19, 2025 | 12:00am
MANILA, Philippines — Isang astig na Cuban outside hitter ang isasabak ng Chery Tiggo sa 2025 Premier Volleyball League (PVL) Reinforced Conference na hahataw sa Oktubre.
Ibabandera ng Crossovers si Cuban outside hitter Yunieska Batista sa kanilang hangad na ikalawang finals appearance ngayong taon.
“Power, performance, and new energy! Outside Hitter Yunieska Batista joins the Chery Tiggo EV Crossovers,” pahayag ng Chery Tiggo sa kanilang social media post.
Naglaro ang 32-anyos na si Batista para sa Yesilyurt Sports Club sa Turkey.
Minalas ang Crossovers sa PLDT High Speed Hitters para sa korona ng nakaraang PVL on Tour.
Kasama si Canadian star Kathryn Bell, tumapos ang Chery Tiggo sa fifth place sa 2024 PVL Reinforced Conference na pinagreynahan ng Creamline kasama si American import Erica Staunton.
Makakasukatan ni Batista sa torneo sina American spiker Courtney Schwan ng nagdedepensang Creamline, Russian outside hitter Anastasiia Bavykina ng PLDT at Greek outside hitter Eva Chantava ng Cignal HD.