October 12, 2025 | 12:00am
MANILA, Philippines — Kaagad nagparamdam ng kanyang lakas si American import Anna DeBeer.
Bumanat si DeBeer ng 37 points mula sa 34 attacks, dalawang service ace at isang block para banderahan ang ZUS Coffee sa 25-15, 19-25, 25-20, 25-23 pagdaig sa Chery Tiggo sa Pool B ng 2025 Premier Volleyball League (PVL) Reinforced Conference kahapon sa Dasmariñas Arena sa Cavite.
“It’s just awesome. I give all the credit to my teammates,” sabi ng dating University of Louisville standout. “Since I arrived, they’ve been incredibly welcoming, and playing in front of a crowd like this – it doesn’t get much better.”
Nauna nang pumalo si Farm Fresh import Helene Rousseaux ng conference-high 38 markers sa kanilang 22-25, 25-23, 25-19, 25-21 paggupo sa Nxled noong Huwebes.
Nagdagdag si rookie AC Miner ng 14 markers, habang naglista si setter Cloanne Mondoñedo ng 22 excellent sets para sa tropa ni coach Jerry Yee.
Hindi na nagulat si Yee sa ipinakita ng 24-anyos na si DeBeer.
“We see this in practice. So hindi naman masyadong surprise sa amin na ganyan iyong performance niya, talagang power, talagang malakas siya,” wika ni Yee sa kanilang American import na nagtala rin ng 14 excellent receptions.
Pinamunuan ni Cuban reinforcement Yunieska Batista ang Crossovers sa kanyang 22 points.
Nakatabla ang Chery Tiggo, ang runner-up sa nagreynang PLDT sa nakaraang PVL on Tour, sa second set, 25-19, bago isinuko ang third frame sa ZUS Coffee, 25-20.
Ito ang ginamit na buwelo ng Thunderbelles para kunin ang fourth set, 25-23, at ang panalo sa pangunguna ni DeBeer.