August 28, 2025 | 12:00am
MANILA, Philippines — Malaking tulong para sa Alas Pilipinas ang training camp nito sa Europa para paghandaan ang FIVB Men’s Volleyball World Championship na papalo sa susunod na buwan sa Maynila.
Para kay playmaker Joshua Retamar, maraming natutunan ang Alas Pilipinas sa Europe dahil mas matatangkad ang mga nakakalaban nito.
Nasa kasagsagan ng training camp ang Alas Pilipinas sa Morocco, Romania at Portugal bilang bahagi ng preparasyon nito sa FIVB Worlds.
Aminado si Retamar na hindi birong makipagsabayan sa mas matatangkad na kalaban. Ngunit magandang oportunidad ito upang mas lalo pang mahasa ang kanilang team bago ang FIVB Worlds.
“At first, I was a bit nervous because everyone here is so tall. We felt like high schoolers compared to them. But we’re happy because we realized that even if we’re smaller, we can still keep up with them,” ani Retamar.
Maraming pinagdaanan na hirap at pagod ang Alas Pilipinas subalit maraming natutunan ang kanilang tropa.
“They have a height advantage, but we can match their skills. Our training camp has been exhausting, but it was so worth it. It helped us a lot,” ani Retamar.
Bahagi si Retamar ng national team na nakasungkit ng pilak na medalya sa 2019 Southeast Asian Games na ginanap sa Maynila.
Kasama na nito sa kasalukuyan ang mga bagitong setters ng Alas Pilipinas na sina Eco Adajar at Elijah Tae-yin Kim.
“The three of us really support each other, especially during games. We always talk about strategies to score quickly, so we’ve become a great trio on the court,” ani Retamar.
Hawak ang Alas Pilipinas ni Italian coach Angiolino Frigoni.
Makakasama ni Retamar ang mga beteranong spikers na sina Bryan Bagunas at Marck Espejo na tumutulong sa kanya upang mas lalo pang mapataas ang kanyang kumpiyansa.