August 26, 2025 | 12:00am
MANILA, Philippines — Nagpasiklab si two-time World Junior Championships campaigner Micaela Jasmine Mojdeh sa 2025 PAI National Swimming Tryouts upang makasiguro ng tiket sa 2025 Southeast Asian Games na idaraos sa Bangkok, Thailand sa Disyembre.
Inilabas ni Mojdeh ang buong puwersa nito upang masungkit ang ginto sa women’s 200m butterfly sa bilis na dalawang minuto at 18.18 segundo.
Nalampasan ng pambato ng Behrouz Elite Swimming Team ang qualifying time standard (QTS) na 2:18.26 para masikwat ang kanyang tiket sa Thailand SEA Games.
Hindi pa nagpaawat si Mojdeh, ang tinaguriang ‘water beast’ sa swimming community, matapos magningning sa women’s 100m butterfly kung saan nagtala ito ng 1:01.89 para maabot ang 1:02.19 qualifying time.
Ito ang unang pagkakataon na masisilayan sa SEAG si Mojdeh matapos ang impresibong kampanya nito sa juniors division.
“I am so thrilled to be part of the SEA Games team. It has been a long time dream of mine. I am so excited for the line up for Philippine girls team. They are all amazing swimmers. I wish more men qualified though. The qualifying time of men was so competitive,” ani Mojdeh.
Tumulak na pa-Amerika kahapon si Mojdeh para simulan ang kanyang college days sa University of Southern California kung saan magiging bahagi ito ng Trojans swimming team.
Pasok din sa national team si Filipino-British Heather White na nagpasiklab sa tatlong events.
Unang umarangkada si White sa women’s 100m freestyle nang itarak nito ang impresibong 56.23 segundo — malayo sa QTS na 58.23 segundo.
Bumanat din ng magandang oras si White sa 200m freestyle tangan ang 2:05.40 para malampasan ang 2:07.17 qualifying bago tapusin ang kampanya nito bitbit ang 25.70 segundo sa 50m freestyle para maabot ang 26.13 qualifying norm.