September 6, 2025 | 12:00am
MANILA, Philippines — Sumuntok si Olympic silver medalist Carlo Paalam ng tiket sa Round of 32 ng 2025 World Boxing Championships matapos bugbugin si Hsu Chiao-Chun ng Chinese Taipei via unanimous decision sa Liverpool, England.
Ipinakita ni Paalam ang kanyang pamatay na kombinasyon para dominahin si Chiao-Chun sa kanilang men’s 55kg bantamweight bout.
Nagmula ang 27-anyos na 2020 Tokyo Olympics silver medal winner sa quarterfinal exit sa 2024 Paris Games.
Sunod na lalabanan ng two-time Olympian bukas si Dominican Republic bet Junior Alcantara para sa Round of 16 spot.
Wagi rin si Junmilardo Ogayre kay Taiwanese Lai Chu-En via unanimous decision sa kanilang Round of 64 fight sa men’s 60kg division.
Makakatapat ni Ogayre si Biibars Zheksen ng Kazakhstan sa Round of 32.
Samantala, nakatakda namang harapin ngayon ni Ronald Chavez Jr. si Matthew McCole sa 70kg Round of 32.
Bukas sisimulan ni Riza Pasuit ang kanyang kampanya sa women’s 60kg kontra kay Ragad Alnaimi ng Saudi Arabia.
Sasagupain naman ni Mark Ashley Fajardo si Elvin Aliev ng Ukraine sa men’s 65kg category.
Nakakuha ng bye si Jay Bryan Baricuatro sa men’s 60kg at hihintayin ang mananalo kina Ergyunal Sebahtin ng Bulgaria at Martin Molina Salvador ng Spain para labanan sa Martes.
Ang inaugural World Boxing Championships, kinikilala ng International Olympic Committee (IOC), ay nagsimula noong Huwebes at magtatapos sa Setyembre 14 na tinatampukan ng higit sa 500 boxers mula sa 60 bansa.