Pilipino Star Ngayon
September 14, 2025 | 12:00am
MANILA, Philippines — Inaasahan ang mahabang PBA Season 50 dahil sa todong suporta sa Gilas Pilipinas para sa malalaking laban nitong sasalangan.
Napagkasunduan ng PBA Board of Governors na i-adjust ang schedule nito kahit pa tatlong conferences pa rin ang lalaruin para bigyan ng sapat na training camp ang Gilas sa paghahanda nito sa 2027 FIBA World Cup Asian Qualifiers at 2026 Asian Games.
Lalarga ang FIBA World Cup Asian Qualifiers sa Nobyembre tampok ang Gilas sa Group A kasama ang Australia, New Zealand at Guam, isang buwan pagkatapos umarangkada ang PBA sa Oktubre 5 sa Smart Araneta Coliseum.
Nakalinya rin ang Asian Games sa Oktubre 2026, habang tuluy-tuloy ang World Cup Asian Qualifers na magiging tulay ng Gilas sa 2027 FIBA World Cup sa Doha, Qatar.
Mula rito, aasa ang Gilas na maging No. 1 finisher sa World Cup upang makasungkit ng awtomatikong upuan sa 2028 Olympics na gaganapin sa Los Angeles, USA.
Dahil dito bukod pa ang 33rd Southeast Asian Games sa Disyembre sa Thailand ay inaasahang tatagal ang PBA ng 14 buwan o hanggang Disyembre 2026.
Sa pangunguna nina coach Tim Cone at naturalized player Justin Brownlee ng Barangay Ginebra, reigning champion ang Gilas sa parehong Asian Games at Southeast Asian Games.
Ilan pa sa mga PBA players na kasama sa Gilas ay sina eight-time PBA MVP June Mar Fajardo at CJ Perez ng San Miguel, Scottie Thompson at Japeth Aguilar ng Ginebra, Calvin Oftana ng TNT at Chris Newsome ng Meralco.
“We want to qualify to the Olympics,” ani Vargas sa idinaraos na PBA Board Annual Planning sa Las Vegas, Nevada.
“Mabigat na tulong ang kailangan, at kasama kami sa magbibigay ng tulong,” dagdag naman ni Marcial.
“We’re all-in in our support to our chairman and going with it is our support to Gilas,” dagdag ni PBA vice chairman Alfrancis Chua na siyang team manager din ng Gilas.