November 8, 2025 | 12:00am
MANILA, Philippines — Puntirya ng ZUS Coffee ang ikaanim na sunod na ratsada para pormal na umabante sa quarterfinal round ng 2025 PVL Reinforced Conference.
Lalabanan ng Thunderbellles ang Choco Mucho Flying Titans ngayong alas-6:30 ng gabi matapos ang bakbakan ng PLDT High Speed Hitters at Galeries Tower Highrisers sa alas-4 ng hapon sa Candon City Arena sa Ilocos Sur.
Bitbit ng ZUS Coffee ang matayog na 5-0 record matapos walisin ang group stage kasunod ang PLDT (4-1), Farm Fresh (4-1), nagdedepensang Creamline (4-2), Capital1 Solar Energy (3-2), Petro Gazz (3-2), Akari (3-3), Cignal (3-3), Choco Mucho (2-3), Chery Tiggo (1-4), Galeries Tower (0-5) at Nxled (0-6).
Huling biniktima ng Thunderbelles ang Chargers via reverse sweep, 23-25, 22-25, 25-23, 25-12, 15-7, kung saan humataw si American import Anna DeBeer ng game-high 33 points bukod sa 12 excellent receptions.
“Definitely, it was hard sitting out the first one, so just being able to play and have such a cool environment here was really fun,” sabi ng produkto ng University of Louisville.
Muling makakasama ni DeBeer sina Jovelyn Gonzaga, Chinnie Arroyo, Thea Gagate, setter Cloanne Mondoñedo at rookies AC Miner at Riza Nogales.
Nasa two-game losing skid ang Flying Titans matapos matalo sa Foxies, 18-25, 13-25, 25-18, 24-26, at sa Solar Spikers, 23-25, 24-26, 19-25, sa kanilang huling dalawang laro.
Isasalang ng Choco Mucho sina American import Marlee Smith, Isa Molde, Maddie Madayag, Kat Tolentino, Cherry Nunag, Des Cheng at Royse Tubino.
Samantala, target rin ng High Speed Hitters ang quarterfinals spot sa pagharap sa kulelat na Highrisers.
Hangad ng PLDT ang kanilang ‘three-peat’ matapos pagreynahan ang mga nakaraang PVL on Tour at Invitational Conference.