August 28, 2025 | 12:00am
Parang bomba nukleyar ang pinasabog ni Senador Ping Lacson laban sa bilyun-bilyong pisong flood control projects ng gobyerno. Ayon sa kanya, sangkatutak dito’y substandard o ghost projects. At nang pumutok ang rebelasyon, nagtakbuhan ang mga kurakot na parang ipis na naistorbo sa dilim.
Binunyag ni Lacson ang “holy trinity” ng katiwalian: gahaman na pulitiko, DPWH engineers, at barkadang contractors. Mula Pampanga, Mindoro hanggang Bulacan, siniksik ang sangkaterbang tiwaling proyekto sa budget bilang “insertions” at “amendments.”
Pinakatampok ang Bulacan, ngayo’y tinaguriang “haunted province” ng korapsyon. Sa 1st Engineering District, idinawit ang mga dating district engineer na sina Henry Alcantara at Brice Hernandez na umano’y humawak ng 28 proyekto, tig-P72 milyon bawat isa sa loob lamang ng 2024. Pare-pareho ang presyo, copy-paste lahat. Hindi man lang sinipag baguhin. Ganyan na ba sila kagarapal?
Agad umalma si Senate Majority Leader Joel Villanueva. Galit niyang kinondena ang “rape” ng kanyang lalawigan at nagpasalamat kay Lacson sa pagsiwalat sa matagal na raw niyang nilalabanan. Talaga lang ha?
May nakakaalala bang umalma siya noon pa? Depensa niya, hindi raw siya nag-lobby at wala raw kilalang contractor. Hindi ito basketball, pero mukhang tatanghalin siyang “defensive player of the year.”
At hindi bago sa kanya ang iskandalo. Noong 2016, may dismissal order laban sa kanya ang Ombudsman dahil sa anomalya ng kanyang P10 million pork barrel. Naligtas lang siya ng teknikalidad.
Pero hindi lang Bulacan ang may multo. Sa Davao, si Rep. Pulong Duterte, anak ni dating President Rodrigo Duterte, umano’y kumorner ng P51 bilyon sa huling tatlong taon ng termino ng ama. Pero binabaha pa rin ang siyudad. Ano’ng nangyari sa pondo?
At huwag kalimutan si Senador Mark Villar. Tahimik noon, maingay ngayon laban sa katiwalian, kahit noong siya’y DPWH secretary, may alegasyon din daw sa ilalim niya ng ghost at recycled projects, ayon kay Senador Jinggoy Estrada.
Klaro ang larawan: sistemiko ang korapsyon sa imprastruktura, mula Duterte hanggang Marcos Jr. Kung seryoso ang gobyerno, dapat may full audit ng lahat ng budget at insertions.
At higit sa lahat, sibakin na si DPWH Secretary Manuel Bonoan! Sa ilalim niya, lalo pang lumakas ang sindikato ng mga mandarambong. Ang pagpapanatili sa kanya ay pagpapanatili rin sa bulok na sistema.