September 4, 2025 | 12:00am
MANILA, Philippines — Nakatakdang umalis ngayong araw ang delegasyon ng Swim League Philippines-Behrouz Elite Swimming Team (SLP-BEST) Patriots na sasabak sa 2025 Asian Open School Invitational (AOSI) Short Course Age Group Swimming Championship sa Setyembre 6 hanggang 7 sa Bangkok, Thailand.
Sumalang sa ilang linggong ensayo ang 11 miyembro ng SLP-BEST Patriots upang masigurong handang-handa itong makipagsabayan sa mahuhusay na bagitong tankers sa Asya sa Assumption University Aquatic Center na gagamitin ding venue ng 2025 Southeast Asian Games swimming competitions sa Disyembre.
Ibabandera ng SLP-BEST Patriots sina La Salle-Greenhills freshman Madi Mojdeh at Immaculate Heart of Mary College-Parañaque standout Mikee Mojdeh.
Ang Mojdeh brothers ay nakababatang kapatid ni two-time World Junior Championships veteran Micaela Jasmine Mojdeh na kamakailan lamang ay nagkwalipika para sa national team na hahataw sa Thailand SEA Games.
Sasalang si Madi sa boys’ 14-year division 200m Individual Medley (IM), 100m breaststroke, 200m backstroke, 100m IM, 200m breast, 200m butterfly, 100m butterfly at 200m freestyle habang masisilayan si Mikee sa boys’ 10-year class 200m IM, 50m backstroke, 100m backstroke, 100m IM, 100m freestyle, 100m butterfly, 50m butterfly at 200m freestyle.
Kasama rin sa delegasyon sina Kaidiyn Brie Waskiewicz (girls-12-year) na sasabak sa 200m IM, 50m free, 25m back, 50m back, 100m back, 25m free at 100m IM; Tanjie Elleise Waskiewicz (girls-16-year) na lalarga sa 50m free, 100m free, 50m back, 50m fly, 200m breast, 100m breast, 50m breast at 100m IM; at Elisa De Kam (girls’ 14-year) na lalaban sa 50m free, 50m back, 50m breast, 50m fly, 100m free, 200m back, 100m back, 200m free.
Hindi rin pahuhuli si Aliyya Faine Mojdeh (girls’ 8-year) 50m free, 100m free, 25m free, 25m breast, 25m back, 50m back, 50m fly at 100m IM gayundin sina Drei Mabilin (boys’ 10-year), Chelsea Faith Sy Bang (girls’ 9-year), Chloe Skye Sy Bang (girls 7-year), Leane Jewel Arellano (girls’ 9-year) at Marien Jade Arellano (girls 9-year) sa kani-kanyang events.
Mamanduhan ang tropa ni SLP-BEST Patriots veteran coach Jeremiah Paez ang na magtatangkang humakot ng medalya laban sa matitikas na tankers sa rehiyon.
“Magandang opportunity ito para sa mga young swimmers to gauge their skills at this high-level competition. It’s one way para mas lalo pang lumakas yung loob nila dahil makikipagsabayan sila sa mga mahuhusay na foreign swimmers from all over Asia,” ani SLP-BEST Patriots team manager Joan Mojdeh.