October 3, 2025 | 12:00am
MANILA, Philippines — Ipinakilala kahapon ng Philippine Sports Commission (PSC) sina “Oyo” at “Aya” bilang official mascots ng Batang Pinoy 2025 sa General Santos City.
Ipinakita rin ni PSC chairman Patrick ‘Pato’ Gregorio at ng buong PSC Board ang mga medalyang ibibigay sa 2025 Batang Pinoy pati ang overall championship plaque at trophies sa press conference na idinaos sa Century Park Hotel sa Manila.
Humigit-kumulang sa 24,000 delegates mula sa buong bansa ang lalahok sa nasabing annual sports event na huling isinagawa sa Puerto Princesa City, Palawan noong nakaraang taon na pinagharian ng Pasig City.
Nakatakda ang 2025 Batang Pinoy sa Oktubre 25 hanggang 30.
Pinamunuan din ni Gregorio ang MOA signing kasama ang mga partner institutions ng PSC para sa 2025 Batang Pinoy.
“We are more ready than ever,” ani PSC Commissioner at BP project director Bong Coo.
Kabuuang 27 sports ang lalahukan ng mga batang atletang may edad 17-anyos pababa.
Ang mga ito ay ang aquatics-swimming, archery, arnis, athletics, badminton, basketball (3×3), boxing, chess, cycling, dancesport, futsal, gymnastics, jiu-jitsu, judo, kickboxing, karate, muay, pencak silat, sepak takraw, soft tennis, tennis, table tennis, taekwondo, volleyball, weightlifting, wrestling at wushu.