November 16, 2025 | 12:00am
MANILA, Philippines — Isang world class delegation ang ipaparada ng Team Philippines sa 2025 Southeast Asian Games na papalo sa Disyembre sa Bangkok, Thailand.
Nangunguna sa listahan si Tokyo Olympics gold medalist Hidilyn Diaz na pamumunuan ang national weightlifting team na magtatangkang humakot ng ginto.
Ito ang unang torneong lalahukan ni Diaz sa nakalipas na isang taon kaya’t inaasahang gigil na makabalik sa winning form ang mahusay na weightlifter.
Hindi nakalahok si Diaz sa 2024 Olympic Games sa Paris, France matapos makuha ni Elreen Ando ang slot para makapasok sa quadrennial meet.
Sa SEA Games, masisilayan si Diaz sa women’s 58-kilogram event.
Makakasama ni Diaz sa kampanya sina Fernando Agad (men’s 60 kg), Dave Lloyd Pacaldo (men’s 65 kg), Albert Ian Delos Santos (men’s 71 kg), John Dexter Tabique (men’s 94 kg), Rosegie Ramos (women’s 48 kg), Jhodie Peralta (women’s 53 kg), Elreen Ando (women’s 63 kg) at Kristel Macrohon (women’s 69 kg).
Malalim na rin ang karanasan ng mga miyembro ng national team.
Si Agad ay gold medalist sa IWF World Championships na ginanap sa Norway noong Oktubre habang nakahirit naman si Pacaldo ng ginto sa Southeast Asian Championships sa Singapore.