August 28, 2025 | 12:00am
MANILA, Philippines — Tumataginting na P13.4 milyon ang masisiguro ni Alex Eala kung maipapanalo nito ang kanyang second round game sa US Open na ginaganap sa USTA Billie Jean King National Tennis Center sa Queens, New York.
Nakatakdang makaharap ni Eala si Cristina Bucsa ng Spain sa second round kung saan nakataya ang $237,000 prize money o mahigit P13 milyon.
Sa kasalukuyan, may $154,000 o halos P9 milyon na si Eala sa pagpasok pa lamang nito sa second round.
Umabante sa second round si Eala nang itarak nito ang 6-3, 2-6, 7-6 (11) panalo laban kay world No. 15 Clara Tauson ng Denmark.
Target ni Eala na masundan ang magandang momento nito kaya’t inaasahang ibubuhos nito ang lahat upang masiguro ang tiket sa third round.
Sa pagpasok ni Eala sa second round ng US Open, nasa ika-69 puwesto na ito sa WTA live rankings.
Masaya si Eala sa paglago ng tennis hindi lamang sa Pilipinas maging sa Southeast Asian region.
“I’m so happy to see the progress of tennis in Southeast Asia in general. I’m happy that players from this region are coming up and starting to be successful,” ani Eala.
Maliban kay Eala, pasok din sa second round si Janice Tjen ng Indonesia na kilala nito dahil nakakasama na niya ito sa mga tennis circuits.