December 15, 2025 | 12:00am
MANILA, Philippines — Umiskor ang mga operatiba ng pulisya kasunod ng pagkakaaresto sa isang hinihinalang High Value Target (HVT) habang nasa P6.7-milyong halaga ng shabu ang nasamsam sa drug bust operation sa Purok Villa Esperanza, Brgy Tangub, Bacolod City, Negros Occidental nitong Sabado.
Ayon sa Bacolod City Police, ang nasakoteng suspect sa pangalan lamang nitong Paul, 23-anyos, residente ng nabanggit na lugar.
Sa report ni Bacolod City Police Director P/ Col. Joeresty Coronica, ang suspect ay nasakote ng mga elemento ng Police Station (PS)-8 sa nasabing lugar dakong alas-5:55 ng hapon.
Ayon kay Col. Coronica, isang pulis na nagsilbing poseur buyer at nakipag-deal sa suspect matapos na makumpirma ang pagtutulak nito ng droga sa isinagawang surveillance operation laban dito.
Inaresto ang suspect sa aktong iniaabot ang droga sa poseur buyer.
Narekober mula sa suspect ang maraming plastic sachets na naglalaman ng 1,025 gramo ng shabu na may halagang P6,790,000 at marked money.